《鼓動真我》中的成功論
—
Andrew : I'd rather die drunk, broke at 34 and have people at a dinner table talk about me than live to be rich and sober at 90 and nobody remembered who I was.
—
真正嘅成功，總係離唔開孤獨、淚水同血汗。而《鼓動真我》，就係一套講述追求極致成功嘅電影。
—
之所以會孤獨，係因為無人，或者世界上只有極少數嘅人能夠理解你喺度追求緊啲乜，做咩咁傻仔喺度做啲咁嘅嘢。而就算果樣嘢你本身係幾享受，如果要追求極致，就會係折磨，你亦會同世界上「平凡人」嘅距離顯得愈嚟愈遠。《鼓動真我》入面一幕食飯戲就非常精彩，主角Andrew同親戚朋友同台食飯，言談間無人對Andrew嘅打鼓技術表現出重視，但反而對席間打欖球嘅同輩顯得非常欣賞，然後Andrew一怒之下講咗上面嘅果番說話。
—
到底咩先係成功？喺電影入面，同輩破咗校內欖球Division 3嘅達陣紀錄，因而得到長輩嘅讚賞；但Andrew入到國內最好嘅音樂學院，成為核心鼓手，反而無人問津。究竟係咪要跟住社會主流對於「成功」嘅定義去做，先係真正嘅成功呢？魔鬼教師Fletcher對Andrew嘅一席話—「唔好理其他人嘅眼光」，就係電影嘅答案。
—
另一幕戲講Andrew同佢爸爸睇戲，佢爸爸同自己個仔講，只要佢到咗自己嘅年紀，就唔會再鑽牛角尖，但個仔就答：「我就係要鑽牛角尖。」有車有樓叫唔叫成功？兒孫滿堂叫唔叫成功？出名叫唔叫成功？我唔知，但我清楚所有嘅成功都係要「與別不同」，而要與別不同，就要鑽牛角尖。成功嘅定義係指，你透過努力而同一般人產生嘅距離。
—
其他樂隊嘅成員番九點，你番六點；其他人遇到魔鬼訓練會放棄會轉科，但你繼續堅持。你會面對高低起伏，會面對後來者嘅挑戰，會面對前輩嘅壓力。你必須接受自己一文不值，然後先會學識謙卑，知道高度專注嘅重要，不斷努力，做到盡善盡美。
—
Andrew同Fletcher，其實都係同一類人，願意為自己嘅事業犧牲一切，一個撞咗車都要繼續去表演，一個寧願比學院炒魷魚，都從來唔會因為自己嘅魔鬼訓練而講任何一句後悔。唔同嘅地方在於Andrew暫時只係為咗自己嘅自尊，而Fletcher就係為咗培育世界下一個偉大嘅音樂家。
—
呢一種成功，其實未必可以為你帶嚟名利，但點解仲可以稱為「成功」？係因為世界由於你嘅努力，而前進咗多一步。社會並唔需要故步自封嘅人，突破你嘅極限，三十四歲死又如何？總好過苟且到九十歲，但仍然未真正活過。
—
唔好怕孤獨，反而要享受孤獨。追求成功亦唔代表要孤芳自賞，指揮以外嘅Fletcher一樣可以和藹可親，可以同其他人建立良好嘅關係。人好多時去到最後，清楚自己做緊咩，同自己交代到，就可以了。
—
畫作：塵阿力映畫
（《鼓動真我》係我同阿力合作嘅第四幅畫，每一幅都要畫好耐好耐，請多多支持！like, share and comment!!）
Search